Lýst er eftir gefanda...

...að þessari fallegu sængurgjöf:

Teppi þetta barst innpakkað í grænt glans-búbblu-umslag stílað á Ágúst Inga Ágústsson (er þetta kannski ekki sængurgjöf heldur sjal handa Ágústi?) og poka með héramyndum.  Engar vísbendingar um sendanda aðrar en að umslagið er stimplað á Íslandi.  Hugsanleg vitni vinsamlega gefi sig fram hið fyrsta.

Annars er það að frétta af fjölskyldunni að við erum á fullu að læra hvert á annað.  Brjóstagjöfin er í fínum málum, móðirin er farin að átta sig á hvenær guttinn þarf að ropa og fá nýja bleiu etc, en reyndar fer allt í vitleysu stundum þegar Ágúst Ísleifur fær illt í magann, þá eru foreldrarnir frekar ráðalausir.

Stráksi prófaði að fara í bað heima hjá sér við álíka takmarkaðar vinsældir og á spítalanum:

  

Barn í bala, bali í vask og sést glitta í nýja fína skiptiborðið í horninu.

Hins vegar er gott að fá sér lúr á eftir með bros á vör.

Og augu sem bræða hjörtu.

En pabbanum fannst reyndar að móðirin hefði keypt full stelpu-smábarnalegar samfellur á drenginn (blúnduverk í hálsmáli og á ermum úff) svo hann skaust í búðina og keypti nokkrar gæjasamfellur, síðan slappa þeir feðgar af saman í strákafötunum sínum

   

 

Athugasemdir

[amma Guðný (IP-tala skráð) 3.7.2008 kl. 18:01]

Ja hérna en flottar myndir af feðgunum. Ég var rétt í þessu að prenta út myndir í lit fyrir afa Ágúst og þá birtust þessar fínu myndir. Núna er gaman að eiga góðar græjur þegar svona fínar myndir eru í boði. Mikið ofboðslega hlakka ég til að þið komið heim í heimsókn.

Kær kveðja amma Guðný

[Kristbjörg Clausen (IP-tala skráð) 3.7.2008 kl. 19:17]

Jedúddamía, voðalega er maður sætur

[Hallveig (IP-tala skráð) 3.7.2008 kl. 20:14]

ekkert smá falleg mynd af feðgunum að fá sér gæjablund !!  Það fer aldeilis vel um litla guttan í öruggum og stórum pabba höndum.

Kær kveðja frá systir, mágkonu og frænku

[Daníel (IP-tala skráð) 3.7.2008 kl. 21:34]

Þetta dæmist víst á okkur Elínu. Þ.e. Elín prjónaði teppið og ég setti það í póst. Fattaði svo um leið og ég var búinn að loka umslaginu að ég hafði ekkert sagt til um frá hverjum það væri, en þorði ekki að setja neina merkingu utaná ef einhver hefði nú farið að ruglast á sendanda og viðtakanda. Svo rukum við í sumarfrí austur í land og það gleymdist að láta vita fyrirfram....

... allavega, vona að þetta komi að einhverju gagni!

 Daníel

p.s. sammála þeim sem lýsa yfir hrifningu af myndunum. Einstaklega fallegar og einlægar myndir.

[Hildigunnur Rúnarsdóttir, 3.7.2008 kl. 22:42]

haha, maður verður að eiga gæjasamfellur!  Finnur átti eina bláa með síðum ermum, algjör snilld. 

[Hulda Sig. (IP-tala skráð) 4.7.2008 kl. 09:12]

Æ hvað maður er ofboðslega fínn, svo mannalegur og flottur.   Gangi ykkur vel elskurnar mínar og ég hlakka til að sjá ykkur þegar þið komið til landsins.
Knús og kossar, luv ;o)

[Elín Björk (IP-tala skráð) 4.7.2008 kl. 10:02]

Mig grunaði að svona gæti farið þegar ég sendi Daníel á pósthúsið - og ég tek annar fulla ábyrgð á teppinu! Vona að það komi að góðum notum, má setja í þvottavél!! á 30-40°C - en sleppa þurkaranum :-)

Við eigum svo sirka milljón ráð við magaverkjum hjá svona stubbum, getum sent lista yfir þau sem dugðu stundum, einusinni, í eina viku eða aldrei. Ekkert sem dugði alltaf!

Fallegar myndir, og yndislega fallegt barn. 

Kveðja, Elín Björk. 

[Halldóra Viðars (IP-tala skráð) 4.7.2008 kl. 10:24]

Fallegar myndir af fallegum strák, svo lítill og sætur :)

Hlakka til að sjá hann og koma við hann!

[Lovísa (IP-tala skráð) 4.7.2008 kl. 12:36]

jiiiminn hvað maður er mannalegur :) soldið líkur pabba sínum! amk á þessum myndum! hlakka til að sjá ykkur

[Lára Bryndís Eggertsdóttir, 4.7.2008 kl. 13:13]

Veiii gátan leyst!  Takk fyrir okkur E&D, mjög fallegt teppi og skemmtilega óhefðbundið, gaman að snúa upp á vanafestuna og hafa teppið kringlótt!

P.S. Daníel, maður skrifar sendandann aftan á og krossar svo yfir, þá sendist bréfið bara í eina átt

[Dagbjört (IP-tala skráð) 4.7.2008 kl. 18:06]

Það mætti halda að þú hefðir unnið á pósthúsi Lára :)

Hlakka svooooo til að sjá ykkur eftir voðalega fáa daga!

[Einar Clausen (IP-tala skráð) 4.7.2008 kl. 20:51]

Dásamlegar myndir. Ómetanlegt.

Einsi

[Valgerður (IP-tala skráð) 5.7.2008 kl. 00:28]

Sæl kæra kórstýra.

Okkar innilegustu hamingjuóskir með nýja og fallega frumburðinn ykkar hjóna, Ágúst Ísleif.  

Alltaf alveg hrikalega gaman að fylgjast með blogginu þínu.  Meðfram að halda utan um brjóstamáltíðir og gæjagalla, haldið þá áfram að veita piltinum gott og gefandi tónlistaruppeldi.  Hann er svo góðu vanur. Stundaði nefnilega kóræfingar og messusöng af kappi í Grafarvogskirkju í vetur. Tóneyrað vill örugglega áfram sitt - einhverja sálmasöngva og ef til vill svolítinn Sjúbba svona við og við. Ekki var annað að sjá en honum litist vel á, allavega dafnaði hann látlaust.

Takk fyrir samveruna og hafið það sem best,

Valgerður og Indriði í Kór Grafarvogskirkju 

[Ágúst Ingi (IP-tala skráð) 5.7.2008 kl. 12:48]

Schubert er nú bara fyrir kettlinga - þessi er fóðraður á Messiaen frá fyrsta degi...

[Lára Bryndís Eggertsdóttir, 5.7.2008 kl. 18:08]

Hvorki faðir né sonur kvartaði þegar ég setti Schubert á fóninn áðan, og svo hljómar drengurinn nú stundum dálítið eins og kettlingur...