Geislavirk snuð, rafmagnsflugnaspaðar, ofurkíttispaðar, salatþeytivindur

Já allt er nú til.  Sumt býsna nauðsynlegt þó furðulegt sé. 

Nýjasta þarfaþingið á heimilinu er sjálflýsandi snuð sem er auðvelt að finna í myrkri, hefur þá skemmtilegu aukaverkun að gera barnið frekar draugalegt. 

Rafmagnsflugnaspaðinn er mjög mikilvægt heimilistæki, grillar allt frá mýflugum upp í risakóngulær með hvelli, blossa og reykjarlykt (eins og af brenndu hári). 

Ofurkíttispaðinn er risakökuspaði frá Elínu, notaður til að vippa köku t.d. yfir á fat.  Olli miklum heilabrotum þegar hann kom úr einum jólapakkanum í fyrra, reyndar merktur frá Elínu til Hauks en var samt til mín, en það er allt önnur saga, Haukur klóraði sér bara í kollinum.

Salatþeytivinda er það eina sem er ekki til á heimilinu, hugsa sér, eins og hún er nú nauðsynleg í hverju eldhúsi.

Furðulegt

Ok ekki spyrja mig af hverju ég veit allt um fæðingarorlof í Lúxemborg, en allavegana komst ég að því (fyrir tilviljun) að:

A: 8 vikur teknar fyrir fæðingu, þú mátt reyndar vinna ef þú skilar inn læknisvottorði um að þú sért hæf til þess (þveröfugt við Ísland).

B: 8 vikur eftir fæðingu skylda (mátt ekki vinna), 12 vikur ef þú ert með barnið á brjósti!

Gott og vel að hygla brjóstagjöfinni á þennan hátt, hún er vissulega ákaflega tíma- og orkufrek, en hvað með allar mömmurnar sem t.d. eru allar af vilja gerðar að hafa barnið á brjósti en það bara gengur ekki af einhverjum ástæðum, þurfa þær mæður og barn ekki á viku 8-12 að halda?

Skammt stórra högga á milli, þ.e. stórafmælanna

Litli njóli 5 mánaða í dag og kátur með það.  Orðinn svo fullorðinn að hann kann ýmislegt fyrir sér, t.d. að sitja í bala

Og naga á sér tærnar.  Uppgötvaði hægri fót í síðustu viku, við bíðum spennt eftir að vinstri detti inn. (Ég geri mér grein fyrir því að þetta er vissulega vinstri fótur á myndinni, ætti ég að viðurkenna að hún sé pínulítið uppstillt því fótanagið kemur ekki eftir pöntun þegar myndavélin er dregin fram.)

Annars eru menn frekar lúnir á þessu heimili, svefninn fer þó eitthvað skánandi sem betur fer.  Ágúst smitaðist loksins af magapestinni þrautseigu og var frekar daufur um helgina, og nú er hann farinn til Kaupmannahafnar á námskeið svo ég er grasekkja út vikuna .

Ég rétt svo gat dröslast á lappir í morgun eftir svona la-la nótt og farið í mömmuleikfimi kl. 10, sá samt næstum því eftir því, steig í 60% tilfella í vitlausa átt í pallaleikfiminni og missti allt sjálfstraust .

En talandi um þroska barnsins, þá hef ég hlerað í hornum að það þyki alveg agalegt hvað er mikil pressa á grey drengnum að vera settur í tónlistarskóla 4 mánaða, jesúsguðalmáttugur á þetta barn ekki að eiga neina æsku og fá að njóta þess að vera smábarn.  Ég jesúsa mig bara í staðinn yfir litlu aumingjans börnunum sem eru skikkuð í ungbarnasund rétt sloppin út úr móðurkviði og á náttúrulega ekkert fyrir þeim að liggja nema sundæfingar það sem eftir er og eintóm vonbrigði foreldranna ef þau setja ekki hvert íslandsmetið á fætur öðru.  Já svona er lífið.

Hér er Ágúst Ísleifur einmitt í tónlistarskólanum, fylgist með pabba sínum mastera hristieggið.  Þetta var ca. 5 mínútum áður en hann steinsofnaði af því að hann hafði ekki sofið almennilegan hádegislúr.  Meiri slugsinn að sofna í skólanum...

Svefnleysi í Lindeparken

Ágúst Ísleifur ákvað að skipta nætursvefninum út fyrir org og gól.  Foreldrarnir óhressir.  Komnar þrjár nætur í röð og sífellt myglaðri andlit sem mæta okkur í glansandi IKEA-speglunum inni á baði á morgnana.  Væri kannski í lagi ef stráksi væri ekki líka hættur að sofa almennilega á daginn hrmpff .

Labbakútur 20 vikna

 

 

En hvernig er það, spretta eyrun hraðar en rest??

Komin heim

Kalt. Enginn ælir.

Þæga barnið...

...hefur ekki sagt orð í allan dag.  Liggur núna og lúrir, sofnaði bara með dótið sitt.  Hef heyrt að það séu til svona börn sem dunda sér sjálf, sofna sjálf og kvarta aldrei, en grunaði ekki að Ágúst Ísleifur yrði eitt af þeim.  Greinilega enn þá slappur.  Þetta er dálítið eins og sæludagur Ágústar eiginmanns míns daginn eftir brúðkaupið.  Ég var orðin slæm í hálsinum fyrir brúðkaupið, kláraði röddina á brúðkaupsdaginn og kom ekki upp orði daginn eftir.  Ágúst naut þagnarinnar og rólegheitanna út í ystu æsar og sagði með eftirvæntingu "verður þetta alltaf svona?".  En neiii... honum varð víst ekki að ósk sinni

Annars er Ágúst Ísleifur allur að hressast, meltingin komin í nógu góðan gír til þess að hann er búinn að gera bæði nr. 1 og 2 í rúmið (nr. 2 m.a.s. 2x) vegna ofurtrúar móðurinnar á að það kæmi ekki neitt út um þann endann og fínt að nota tækifærið og viðra bossann.  Þeinkgod fyrir að hann lá á undirbreiðslu.  Ég vil engar spurningar um af hverju honum hafi tekist að kúka tvisvar í rúmið með skömmu millibili að móður sinni áhorfandi.  ("Ágúst Ísleifur, af hverju ertu með kúk á tánum? Ágúst Ísleifur, af hverju er MAMMA ÞÍN með kúk á tánum?" )

Framhaldspúff

10 mínútum eftir síðustu færslu byrjaði stúfur að kasta upp og baukaði við það hálfa nóttina.  Það skýrir líklega af hverju hann var svona grunsamlega rólegt (eðlilegt?) barn í gærkvöldi.  Orðinn kátur aftur núna en frekar lufslulegur.  Vona bara að við höfum ekki smitað neinn í gær

Allt annað, skuldaráðgátan í Langholtinu ekki enn ráðin, sendi Möggu og Sigurbirni sem voru skráð fyrir bréfinu póst, fékk svar frá Möggu um að hún væri nú ekki með yfirlitin við hendina en ætlaði að finna út úr þessu.  Og fussum svei og fussum svei.  Ég ætti nú ekki annað eftir en að fara að borga með mér í Langholtinu.  Over min døde krop.

Púff

Heilmikil vinna að breiða út fagnaðarerindið og sýna öllum hvað Ágúst Ísleifur er mikil dásemd.  Hámark knússins í dag var þegar við heimsóttum Kötu frænku og öll fjögur hennar börn krúttuðust í Ágústi Ísleifi í einu.  Gleymdi minni myndavél en mun innheimta myndir hjá Kötu!

Hér er Auður Agla með tvo í takinu, vinirnir Úlfar Jökull og Ágúst Ísleifur flottir með smekki í stíl.

Annars vona ég að uppeldið bíði ekki hnekki af óreglunni undanfarið, bæði á mér og honum, sei nó mor.  Ætti til dæmis ekki að segja frá því að núna sofi hann í bílstólnum í forstofunni upp úr 11 og mamman nenni ekki í háttinn...

Ótrúleg afköst

Ég er að hamast við að hitta alla og fann nýja aðferð, í hvert skipti sem einhver býður mér í heimsókn býð ég einhverjum öðrum með mér.  Vona að það fæli fólk ekki frá því að bjóða mér heim.  Bauð Ólöfu með mér til Halldóru, Dagbjörtu og Ólöfu til Hauks og Adrians (nánari skýringar líklega nauðsynlegar), Auði til Gunnhildar, fór reyndar bara ein (nja með Ágústi Ísleifi) til ömmu og Guðnýjar Einars...

En hvar kemur Adrian (Elínarmaður) inn í málið? Jújú útlendingar streyma til landsins að kaupa vinnuvélar og fyrirtækið hans Adrians er einmitt vinnuvéla-kaup-og-sölu-fyrirtæki svo hann er mættur í verslunarferð.

Btw komin í Hlíðarhjallann til mömmu, minni á að ég fer á sunnudaginn svona ef einhvern langar óendanlega til að hitta mig