Lára organisti seiseijá

Ég geng um dags daglega og segist vera organisti (allavegana "aðallega organisti" og svo kemur einhver furðuleg útskýringarræða) en spila samt ekkert sérstaklega mikið, mæti á hjólaæfingar á sunnudagsmorgnum eða (oftar núorðið) ligg bara í bælinu og hlusta á útvarpsmessu og hía á alla organistana sem þurfa að spila á hverjum sunnudegi.

En úbbosa nú ég á aldrei framar frí á sunnudögum. 

Í fyrsta lagi þá er ég að leysa Eyþór af á Akureyri nokkra sunnudaga í janúar og febrúar og spila líka fyrir sunnan inn á milli. 

Í öðru lagi þá var ég að ráða mig í Grafarvogskirkju, tek við kirkjukórnum strax í næstu viku og messunum þegar ég hef lokið mér af á Akureyri.  Vill einhver reyna að giska hvað ég ætla að spila yfir mörgum fermingarbörnum í vor?  Svo verð ég bara í Grafarvoginum þar til ég rúlla af orgelbekknum og fæði barn, og þá sef ég ábyggilega ekki út á sunnudögum framar.

Athugasemdir

[Sibba (IP-tala skráð) 19.1.2008 kl. 23:10]

Vá það er aldeilis!!  Innilega til lukku með þetta allt saman  

[Eyþór (IP-tala skráð) 19.1.2008 kl. 23:26]

Ég er viss um að engin hefur fætt á orgelbekk.  Það myndi nú vera táknrænt fyrir áhuga ykkar hjóna á orgelum að taka orgelbekk með á fæðingarstofuna.  Aldrei velt því fyrir ykkur?

[Hildigunnur Rúnarsdóttir, 20.1.2008 kl. 16:52]

Er Hörður að hætta? :o Vona hann sé ekki veikur. Passaðig á fermingarmessunum, Hörður einmitt yfirkeyrði sig á þeim í fyrra...

(til hamingju, annars :D)

[Lára Bryndís Eggertsdóttir, 20.1.2008 kl. 17:44]

Eruði rugluð að óska mér til hamingju!? Ég með mína fastráðningafælni er alveg miður mín yfir þessu...   En kannski bankareikningurinn kætist.

[Dagbjört (IP-tala skráð) 24.1.2008 kl. 02:10]

Til hamingju eða hvað sem það er sem þú vilt að ég segi

Sumar konur mæta með fæðingarstóla á fæðingardeildina - þið getið mætt með orgelbekk.