Lára Bryndís Eggertsdóttir

30.9.2008 | 18:30

Setja ekki annars allir kristalsljósakrónuna sína í uppþvottavélina af og til?

Þegar við keyptum húsið erfðum við fullt af innbúi í leiðinni og þar á meðal forláta ljósakrónu. Eini gallinn að að hann Tage gamli reykti pípu eins og verksmiðjustrompur og ekki aðeins eru veggirnir í borðstofunni dökkbrúnir heldur voru líka tóbakstaumar og annað ógeð á kristöllunum (ojæja, kannski ekki alveg ekta kristall). Tengdamamma sló ekki vindhögg þegar hún stakk upp á að ég skellti draslinu bara í uppþvottavélina. Ég tók mig svo loksins til í gær og pillaði ljósakrónuna niður og raðaði í uppþvottavélina.

Það kom allt glansandi fínt úr oppvaskemaskínunni, en síðan er heilmikil gestaþraut að púsla krónunni saman aftur (rétt eins og íslensku krónunni) en það er að hafast.

Ólöf Júlía (sem var í heimsókn og fór í morgun) studdi mig mjög í þessu verkefni, en annars var hún að stinga upp á sniðugum heimilisiðnaði fyrir mig - markaðssetja afslöppunarfrí í Horsens. Óvæntur kostur við bæinn að HÉR ER EKKERT HÆGT AÐ GERA. Engin söfn sem eru of merkileg til að missa af þeim, engar búðir sem eru of merkilegar til að missa af þeim, engin náttúruundur sem eru of merkileg til að missa af þeim... Já og danska krónan líka bara allt of há til að nokkrum Íslendingi detti í hug að gera neitt sem kostar peninga.

En við Ágúst eyddum nú peningum í dag. Hann var í fríi í dag og við splæstum í ódýrasta bílaleigubílinn í Horsens.

Lej en Opel Corsa til den rigtige pris

Höfðum ekki miiiiklar áhyggjur af því þó hann subbaðist aðeins út við nokkrar ferðir í endurvinnsluna, og svo skutluðumst við til Árósa í smá IKEA-skemmtiferð og kíktum aðeins á miðbæinn. Dýrt spaug, eins gott að eiga ekki bíl, bensínið sem við notuðum í smá útréttingar á einum sólarhring kostaði 270 danskar krónur, þorir einhver að reikna það yfir í íslenskar á genginu 19?

Síðan er ekkert lát á gestaganginum, Haukur tekur við af Ólöfu (lendir beint í volgu rúmi) og verður fram á sunnudag, á eftir að finna einhver sniðug verkefni til að þræla honum út. Veit samt ekki hvort hann er rétti maðurinn til að klára að samle kristalsljusekronen

Flokkur: Bloggar | Facebook

Athugasemdir

Einhversstaðar las ég að bílafloti Dana væri 15 árum of gamall - það sést kannski best á bílaleigubílnum!! En gott að hafa þetta ljósakrónutrikk á bak við eyrað... ekki það að hér sé kristalsljósakróna, en maður veit aldrei!

Elín Björk (IP-tala skráð) 30.9.2008 kl. 20:07

Til hamingju með hreinu ljósakrónuna. Það verður gaman að dást að henni er ég kem í heimsókn.

Danska krónan er dýrasta krónan komin í 20 isl. kr. og kanski meira núna er ég skrifa þetta algert rán. Enda búið að ræna bankanum mínum.

Tengdó (IP-tala skráð) 30.9.2008 kl. 21:35

Reyndar á mörkunum að ég sé með smá samviskubit yfir að hafa manað þig upp í að tína niður ljósakrónuna og svo farið án þess að hjálpa þér að púsla henni saman aftur! En nei annars, ég er alveg samviskulaus. HA HA!

Ólöf ei lengur skólöf (IP-tala skráð) 1.10.2008 kl. 20:28

Já vertu bara samviskubitslaus þú Ólöf hin samviskulausa, slatti af ljósakrónu enn þá á matarborðinu og Haukur neitar að borða kvöldmat nema ég klári að púsla. Gengi hraðar ef ég væri ekki alltaf að skipta um skoðun hvernig ég raða ljósakrónunni upp. Já og gengi enn hraðar ef ég hefði ekki rokið af stað í að mála stofuna...