Lára Bryndís Eggertsdóttir

28.6.2008 | 12:46

Ágúst Ísleifur kominn heim til sín

Loksins birtast myndir af kappanum! Við komum loksins heim í gær, föstudag. Hálfgert ólag á brjóstagjöfinni og þess vegna vorum við lengur en til stóð, litli maðurinn ákaflega svangur og æstur en hefur ekki alveg þolinmæði til að liggja á brjósti, og vill líka gjarnan naga móður sína með tilheyrandi óþægindum svo það hefur aðeins þurft aðstoð pumpu til að mjólkin endi á réttum stað.

En hér liggur Ísleifur litli sofandi uppi í rúmi hjá mömmu sinni.

Hann þurfti náttúrulega hefðbundna læknisskoðun, ekki annað að sjá en drengurinn sé alheilbrigður (og þar að auki fullkominn...)

Með eindæmum fallegur þar sem hann liggur í mömmufangi, hálfhissa hins vegar þegar pabbi reynir að blekkja hann með fingrinum, það vita nú allir að það kemur engin mjólk úr vísifingri.

Og sefur vært.

Skoðar líka umheiminn. En er þó ekki alltaf alveg sáttur, enda töluverð viðbrigði að vera kominn úr móðurkviði þar sem lífið er alltaf eins og það á að vera, út í stóra heiminn þar sem maður verður stundum svangur og blautur og kaldur...

En það lagast aftur. Og sjáið myndarlegu hendurnar, efnilegur organisti!

Framan af var Ágúst Ísleifur mjög ólífsreyndur, hafði bara komið inn í tvö herbergi á stuttri ævi, fæðingarstofuna og svo stofuna okkar inni á sængurlegudeildinni. En á föstudaginn dró heldur betur til tíðinda!

Hann fór í fyrsta baðið sitt, fannst það reyndar bæði blautt og kalt.

Síðan var komið að því að klæða sig í fyrsta skipti, fram að því hafði hann bara kúrt á bleiunni hjá foreldrum sínum, og hafði reyndar ekki einu sinni lagst í vöggu. En drengurinn er svo ljónheppinn að hafa fengið fínan prjónagalla af Hauki móðurbróður, amma hans prjónaði gallann árið 1969 (löngu áður en Haukur fæddist) en húfan týndist reyndar fyrir einhverjum áratugum svo ég prjónaði nýja með tilþrifum.

Búningurinn er reyndar heldur stór enn sem komið er, en það stendur til bóta.

Síðan var komið að ferðalagi nr. 2, (fyrsta ferðalagið var að koma í heiminn). Við löbbuðum alla leið yfir götuna heim í Lindeparken, Ágúst Ísleifur kúrði bara í burðarsjalinu framan á mömmu sinni og kippti sér ekkert upp við þetta.

Þá er bara eftir að venjast lífinu með barn á heimilinu, ótrúlegt hvað þessi innan við þrjú kíló eiga eftir að breyta lífi allra í kringum hann! Það er heilmikil vinna að sinna honum, aðallega brjóstagjöfin sem tekur tíma og orku, ég sit til skiptis með drenginn í fanginu að reyna að setja hann á brjóst, eða með brjóstapumpuna svo hann fái sitt þó hann sjúgi ekki. Síðan skiptumst við á að gefa honum af litlu staupi, nú eða hjálpumst að þegar illa gengur... (þess vegna hefur líka tekið dálítinn tíma að koma myndunum inn).

En við foreldrarnir erum að sjálfsögðu alsæl með litla manninn og hlökkum til að sýna umheiminum hann betur þegar við komum til Íslands, líklega upp úr miðjum júlí. Þangað til verða myndir að nægja!

Flokkur: Bloggar | Facebook

Athugasemdir

jeminn einasti hvað hann er sætur! Mússí múss... og svo lítill... awww.. Hlakka mikið til að fá að máta hann í júlí! ííhaaaa... :)

Arnbjörg (IP-tala skráð) 28.6.2008 kl. 13:42

Alveg hreint dásamlegur litli drengurinn ykkar, vel gerður og myndarlegur. Hlakka mikið til að fá hann í fangið í júlí. Gangi ykkur vel með brjóstastússið, það getur aldeilis tekið á líkama og sál. Ánægð með burðarsjalið

Sibba (IP-tala skráð) 28.6.2008 kl. 14:09

Jiiisús minn , hef sjaldan séð fallegra barn, ekkert smá svipsterkur! Ég verð að segja að mér finnst hann mjög likur þér Lára á grettumyndinni, kannast mikið við þessa grettu þegar þú ert að teygja þig :) Hlakka rosa til að knúsa þennan fjallmyndarlega dreng í júlí sem og ykkur öll :)

Hildur Guðný (IP-tala skráð) 28.6.2008 kl. 14:10

Óskaplega er þetta myndarlegur drengur! Innilega til hamingju og gangi ykkur öllum vel :-)

vala og jóhanna (IP-tala skráð) 28.6.2008 kl. 16:03

Fallegur litli strákurinn ykkar Stórgóð myndin af honum þar sem Ágúst er með fingurinn upp í honum haha, gott að allt gekk vel, brjóstagjöfin getur tekið á en það kemur allt saman:) Kveðja til ykkar þriggja, Erna H

Móðir, kona, sporðdreki:), 28.6.2008 kl. 17:53

Óskum ykkur innilega til hamingju með þennan dásamlega dreng. Hlökkkum til að kíkja á Ágúst Ísleif, síðar á þessu ári, enda ekki svo langt að fara. Það verður líka ekkert mál fyrir okkur að muna afmælisdaginn þar sem við höfum 9 ára reynslu af því að halda barnaafmæli á Jónsmessu (24. júní). Hafið það sem allra best, - Jóhann Davíð.

Jóhann Davíð og fjölskylda (IP-tala skráð) 28.6.2008 kl. 23:24