Hátindi skassferilsins náð!

Undirrituð náði þeim merka áfanga í dag að vera rekin úr kór fyrir að vera með kjaft!  Hef reyndar aldrei verið í þessum tiltekna kór, en ónefnd vinkona narraði mig til að hlaupa í skarðið fyrir sig í eitt gigg, tvenna tónleika í gærkvöldi og í kvöld.  Ekki var nú æft sérstaklega mikið fyrir tónleikana en kórverkið hékk samt nokkurn veginn saman og við komumst í snyrtilega í gegnum það.  Sama fannst mér ekki um orgeleinleik og -meðleik og blöskraði svo gjörsamlega að ég tók stjórnandann/organistann á teppið eftir tónleikana og sagði hitt og þetta (t.d. æfa sig heima etc.).  Viðkomandi var ekki par ánægður, hringdi í söngmálastjóra og kvartaði og rak mig svo úr kórnum.  Hinn sópraninn í röddinni minni treystir sér reyndar ekki til að syngja rulluna ein í kvöld og hálfraddlaus, spennandi hvernig þetta fer...  Þrátt fyrir nokkuð víðtæka skoðanakönnun hef ég ekki fundið neinn sem var viðstaddur í gær sem er ekki sammála mér, sem betur fer voru ekki mikið fleiri en flytjendurnir sjálfir á tónleikunum og hananú. 

Athugasemdir

[ólöf skólöf (IP-tala skráð) 20.12.2007 kl. 21:13]

Hehehe! Þú ert sko uppáhaldsskassið mitt!

[Hildigunnur Rúnarsdóttir, 20.12.2007 kl. 23:49]

wahahahaha

Reyndar, þrátt fyrir að vera greinilega mjög hörundssár tók stjórnandinn sig á og kórallinn var talsvert miklu betri í kvöld en í gær. Og Sláþúhjartans - bara fyrsta erindi, líklega undirritaðrar frekjuhætti að kenna.

Mótettan rann nokk hikstalaust í gegn, stjórnandinn hafði hringt í fyrrverandi sópran úr Mótettunni, sú sat og rifjaði upp frá fimm til sjö, tvö rennsli, ein athugasemd um að hleypa altinum í gegn á einum stað og þetta gekk.

Mun sáttari eftir kvöldið í kvöld en í gær, í heildina tekið.

En það voru ekki mikið fleiri áheyrendur, samt :p

[Eyþór Jónsson (IP-tala skráð) 21.12.2007 kl. 16:26]

Það að bera ekki virðingu fyrir tónskáldum, flytjendum og sjálfum sér, sem tónlistarmanni, er glæpur.  Það að sýna öllum það virðingarleysi að flytja óæfða tónlist, er ótrúlega óforskammað!  Gott hjá þér skass!

[Hildigunnur Rúnarsdóttir, 21.12.2007 kl. 20:26]

Ég held nú reyndar að hann hafi alveg verið búinn að æfa sig slatta, en þessi kórall er drulluerfiður sem fiðludúett, með continuo, hvað þá að reyna að spila þetta sem fúgu. Efast um að það sé hreinlega hægt.

Með sálminn, hmm, það var ekki aaaalveg úthugsað hvernig hann ætlaði að brúa það bil og nei, líklega ekki æft...