Æsispennandi heimsóknir

Heimsókn no. 1

Ég og Mamma og Elín og Selma heimsóttum Kötu frænku systurdóttur Mömmu í gær (dóttur Helgu systur Mömmu sem við heimsóttum um helgina, svona til að þið hafið þetta á hreinu).  Kata og Maggi hennar maður eiga þvílíka barnahrúgu, <1 árs tvíbura, 1 stóran bróður á leikskólaaldri og svo stóru systur í 6 ára bekk.  Stanslaust stuð á heimilinu! Reyndar var einn vinur stóru systur í heimsókn og honum blöskraði svo hamagangurinn (aðallega í stóru systurinni) að hann var að hugsa um að fara bara heim til systkinanna sinna sex...  En litlu tvíburasysturnar eru algjörar rúsínubollur, Selma var nú hálfskelkuð við þær til að byrja með en var farin að þora að rífa af þeim dótið undir lok heimsóknarinnar, dugleg stelpa.

Heimsókn no. 2

Dagbjört vinkona mín úr læknisfræðinni kom í heimsókn til mín í gærkvöldi.  Elín kom með Selmu í pössun til mín og ætlaði aðeins að stoppa, þá hringdi gönguferða-atvinnuveitandinn minn í mig og talaði heillengi (og skipti í miðju samtali yfir í þýsku, svona af því að ég er að fara að gæda á þýsku fyrir hann, weeeiiiird) svo Elín beið, þá mætti Dagbjört og hafði bara selskap af Elínu og Selmu meðan ég malaði á þýsku í símann endalaust lengi.  Svo gat ég loksins farið að elda hafragraut ofan í Selmustelpuna, þá hringdi tengdapabbi og malaði um byggingaframkvæmdir, nú svo loksins gat Selma fengið grautinn sinn, þá fór hún bara að æla út um allt (ég meina út um allt) svo allt fór í panik og Dagbjört fór að þrífa gólfið (sagði það ágætis tilbreytingu frá því að þrífa blóð og legvatn í vinnunni sinni á kvennadeild, nema það væri reyndar ekki svona vond lykt af því).  Elín hætti við að skilja Selmu eftir í pössun og ég keyrði þær heim (Elín sat við hliðina á Selmu tilbúin með dallinn) og Dagbjört elti til að keyra mig heim aftur.  Svo sýndi ég Dagbjörtu kjólana sem ég var að fá í fyrirfram arf eftir ömmu og ýmislegt fleira dásamlega fínt og þá var bara kominn háttatími og Dagbjört fór heim.  Vilja ekki allir koma í svona dæmigerða heimsókn til mín? Það leiðist allavegana engum hjá mér...

Einstakt tækifæri??

Læknafélag Íslands var að senda mér hátíðlegt bréf þar sem mér er boðið (ásamt maka) í kandídatamóttöku þar sem ég mun undirrita eiðstafinn, læknaeiðinn altså.  Á ég ekki bara að slá til? Þá get ég orðið læknir án þess að hanga í skóla í mörg ár, ég er nú svo mikill náttúrutalent, þeir hafa sjálfsagt séð það og þess vegna sent mér bréfið.  Svo eru líka veitingar í móttökunni.

Selma og sjómannadagurinn

Spilaði í sjómannadagsmessu í Langholtskirkju í gær, við fengum harmonikkuleikara til að halda uppi fjöri fyrir og eftir messu og svo tók hann líka lagið eftir predikun, geðveikt fjör! Mesta stuðið var í kaffinu eftir messu, endaði með því að við vorum farin að syngja í röddum og sátum heillengi.  Það eina sem vantaði var fleira fólk, þori ekki einu sinni að segja hvað voru margir.

Síðan fórum við Mamma, Elín og Selma í kaffi til Helgu systur mömmu á Flúðum.  Selma klappaði hoho:

Síðan fann hún þessa fínu drullupolla:

Drangajökull um síðustu helgi

 

Hér er leiðin, fórum fyrsta daginn (rautt) fram og til baka á Snæfjallaströndinni (rautt), 2. daginn (blátt) yfir jökulinn með viðkomu á Jökulbungu (hæsti punktur) og Hrolleifsborg niður í Reykjarfjörð á Ströndum, 3. daginn yfir NA-hornið á jöklinum niður í Hrafnfjörð í Jökulfjörðum og vorum sótt þangað á báti.

Útsýnið yfir Djúpið frá Snæfjallaströndinni

Gengum inn dalinn upp af Kaldalóninu hans Sigvalda til að komast upp á Drangajökul

 

Haukur makar á sig sólvörn, Kaldalón og Djúpið í baksýn

Útsýnið af Jökulbungu, sést niður í Jökulfirði

Komin upp á Hrolleifsborg, Reykjarfjörður fyrir miðri mynd

Sveitt, þreytt og sólbrunnin, enda var þetta 12 tíma rölt.

Haukur alsæll í sundi í Reykjarfirði, Hrolleifsborg sést í fjarska milli húsanna.  Í Reykjarfirði var byggð fram undir 1960 og talsvert af húsum, bæði gömul og líka ný sumarhús, og að sjálfsögðu þessi fína sundlaug.

Hrolleifsborg um miðja nótt

Síðan töltum við til baka yfir jökulinn.  Svona fer maður að því að fá sér nesti, ég gróf þessa fínu holu undir rassinn á mér og notaði bakpokann sem skjól.  Haukur varð hálfsvekktur þegar hann sá að ég hafði bara grafið einbreiða holu...

Síðan beið báturinn eftir okkur í Hrafnfirði

Það er í alvörunni hægt að sólbrenna innan í nösunum

Komin af Drangajökli.  Veðrið var gott.  Geggjuð ferð.  Meira síðar.

Selma sæta og mamma hennar koma í dag!

Gjöra svo vel að halla höfðinu til vinstri

Útskrifuð!! Orðin gönguleiðsögumaður (með fléttur og syng út um græna grundu allan daginn)

Og farin á Drangajökul sem almennur ferðalangur með FÍ http://www.fi.is/ferdir/ferdir-fi/nr/287

OK þetta er kannski að verða svolítið einhæft...

...en ég var að næla mér í þriðja gullið á Þingvöllum í gærkvöldi, 50 km.  Það eina sem vantar er almennileg samkeppni í kvennaflokknum, var nefnilega 18 mínútum á undan hinni stelpunni sem lét sig hafa það að mæta.  Vísa að öðru leyti í titilinn á bloggfærslu 16.5.2007.

Og á heimasíðu hjólamann stendur:  "Stolt hjólamanna sem fyrr var Lára Bryndís Eggertsdóttir sem sigraði kvennaflokkinn" http://www.hjolamenn.is/index.htm hvar væru þeir án mín...

Til heidurs Agusti og gøtottum hnøkkum

Eg er i Køben, og til thess ad komast thangad thurfti ad fljuga. Agust bordadi harid a manninum fyrir framan hann i flugvelinni thegar hann halladi ser aftur (thad er madurinn, ekki agust, thvi hann (agust, ekki madurinn) er svo kurteis ad hann hallar ser ekki lengst aftur thegar thad er einhver fyrir aftan hann). Agust var sem sagt i versta flugi lifs sins enda baedi kraminn og halflasinn af kvefi, en eg hafdi thad fint, enda frekar nett og get trodid løppunum a mer ut um allt og bundid a mig hnut etc.

En i Køben høfum vid ekkert gert nema aefa (og afhverju ad fara til utlanda tha?) en mer tokst ad skjotast i tvaer hjolabudir.  I hjolabud nr. 1 keypti eg hnakk og var bodid upp a nammi. I hjolabud nr. 2 keypti eg hnakk og fekk blodru i kaupbaeti. Hvernigd a eg ad tulka thetta? Er eg ekki tekin alvarlega? Er Lance Armstrong bodid upp a nammi og blodru thegar hann kaupir hjoladot? Er eg ekki nogu svol? (alltaf staersta ahyggjuefnid)

Og svo hef eg haft nog ad gera vid ad utskyra af hverju mig hafi vantad hnakka og af hverju tvo. Og til hvers gatid a hnøkkunum er (til thess ad pissa a ferd natturulega...). Nefnilega a Islandi fast ekki "dømuhnakkar" heldur bara "kellingahnakkar" sem lita ut eins og mini lazyboy og gera mer ekki serstaklega mikid gagn, og thegar fin dama eins og eg hjolar klukkutimum saman a kallahnøkkum tha endar med thvi ad allur ahugi a barneignum og barneignaundirbuningi er fyrir bi. Semsagt, dømuhnakkar eru med holu svo eg sitji ekki a thu veist, og eg tharf tvo af thvi ad eg a baedi racer og fjallahjol.

Lára behehehestust!!!

Vúhú var að vinna bikarkeppni nr. 1 á racer! 20 km á Þingvöllum, 1.10 á undan næstu konu og það voru heilar 5 í kvennaflokki, jíhaaaa. Komin með 2 gull, gaman gaman.

Og farin til Köben að syngja h-moll, æfingabúðir með mótettukórnum merkilegt nokk, ætla að laumast til að syngja með þeim h-moll í ágúst þegar ég kem af fjöllum...

Þóra frænka lætur í sér heyra

Mánudaginn 14. maí, 2007 - Aðsent efni

Um hjónavígslu samkynhneigðra

Ég styð heilshugar giftingu samkynhneigðra, segir Þóra Ingvarsdóttir í þessari grein

Þóra Ingvarsdóttir

Ég styð heilshugar giftingu samkynhneigðra, segir Þóra Ingvarsdóttir í þessari grein: "Það eru engin góð rök gegn hjónavígslu samkynhneigðra, kynhneigð breytir engu um rétt para til fullgilds hjónabands."

ÞAÐ kom allsvakalega í ljós núna nýverið að það eru ýmsir í okkar samfélagi sem eru andvígir giftingu samkynhneigðra. Ef rætt er við þá sem eru á þeirri skoðun eru yfirleitt gefnar nokkrar aðalástæður fyrir því. Orðið "ónáttúrulegt" kemur oft upp einhversstaðar í þessum sálmum, sem og "ókristilegt". Ég vil byrja á að taka fyrir orðið "ónáttúrulegt".

Fólki finnst t.d. "ónáttúrulegt" að samkynhneigðir gifti sig vegna þess að þannig hefur það aldrei verið – það hefur aldrei þótt eðlilegt að fólk af sama kyni gifti sig, og þess vegna hlýtur að vera rétt að banna það í dag. Jæja, kannski. Ég verð þá að fara og skipta um föt, því ég er kvenkyns og er í buxum – og áður fyrr þótti fáránlegt að konur gengu í karlmannsfötum. Það var ónáttúrulegt. Konur eiga auðvitað að vera heima í sínum kvenmannsfötum og sjá um húsverkin, annað er bara ónáttúrulegt. Semsagt, það er ýmis "ónáttúran". Það sem ég á við er að sú staðreynd að eitthvað hafi þótt óeðlilegt áður fyrr þarf ekki endilega að þýða að það sé óeðlilegt í dag. Við lifum í jafnréttisþjóðfélagi (eða reynum a.m.k. að telja okkur trú um það), og það að banna fólki að gifta sig vegna þess eins að það er ekki hrifið af gagnstæðu kyni er u.þ.b. eins gáfulegt og að banna fólki að vinna bara vegna þess að það er ekki með Y-litning.

Nú, síðan gætu einhverjir farið að tala um blessuð börnin. Samkynja pör geta (augljóslega) ekki getið börn saman, og geta þess vegna ekki sinnt því hlutverki hjónabandsins að fjölga mannkyninu. Þar sem fólksfjölgun er heimsvandamál sé ég ekki að þetta ætti að skipta neinu máli – það geta heldur ekki öll gagnkynhneigð pör eignast börn. Er annar aðilinn í sambandinu ófrjór? Á þá að banna þeim að giftast, bara vegna þess að þau geta ekki getið barn saman? Það yrði ekki vinsælt.

En ekki er öll nótt úti fyrir samkynja pör sem langar í börn – það væri hægt að leyfa pörunum að ættleiða. Að mér vitandi hefur þeim börnum sem alin eru upp af samkynhneigðum ekki orðið meint af því; en sumir myndu kannski segja að það væri ekki gott fyrir barnið að alast upp föður- eða móðurlaust. Að sjálfsögðu er þetta allt annað mál þegar barn elst upp hjá einstæðu foreldri, svo lengi sem það er gagnkynhneigt. Það er allt í lagi að barnið alist upp föðurlaust, svo lengi sem það á bara eina móður. Hvort er í rauninni eðlilegra, að eiga tvo feður (eða tvær mæður) eða eitt foreldri sem er bæði faðir og móðir? Er ekki betra að alast upp hjá tveimur foreldrum sem þykir vænt um barnið og hvoru um annað?

Jæja, nóg af ónáttúrunni (þó það væri vitaskuld hægt að tala lengi enn um hana). Snúum okkur að orðinu "ókristilegt".

Það eru alls ekkert allir trúaðir í íslensku samfélagi í dag, langt frá því. Hins vegar breytist alveg ótrúlegasta fólk í guðhrædda sunnudagaskólaengla þegar umræða um giftingu samkynhneigðra kemur upp, og fer að veifa frösum eins og "ekki skv. Biblíunni", "Guði óþóknanlegt", og hinum klassíska "það er ókristilegt". Ég vil byrja á að taka fram að Biblían segir margt um siðsamlegan lifnaðarhátt, og er ágæt bók að því leyti. En ég hef hvergi fundið að í henni standi "þú skalt ekki elska manneskju af sama kyni", eða nokkuð annað sem mætti túlka sem slíkt nema með mestu herkjum og útúrsnúningum. Ég kíkti á kaflana sem eru oftast gefnir sem rök fyrir því að Biblían fordæmi samkynhneigð, og þeir fordæma ýmislegt – djöfladýrkun, heiðnar svallathafnir, nauðganir, og margt fleira sem mér finnst í ágætu lagi að fordæma – en ég sé hvergi að þar standi að ekki megi eiga í ástarsambandi við manneskju af sama kyni.

En gleymum því smástund að fordæmingar Biblíunnar á samkynhneigð eru vægast sagt mjög vel faldar, ef þær eru þá þar á annað borð, og hugsum aðeins um önnur mál sem tengjast Biblíunni og kirkjunni gegnum aldirnar. Lögun jarðarinnar, tilurð og aldur heimsins – þar hafa skoðanir sem betur fer breyst um það hvað talið sé rétt og rangt. Nú er ég ekki að gera lítið úr Biblíunni, það er hin ágætasta bók. En málið er að sumu sem stendur í henni (eða er jafnvel bara túlkað uppúr henni) verður að taka með góðum fyrirvara.

Ég trúi á Guð, og að honum þyki vænt um okkur. Og einmitt þess vegna held ég að hann fordæmi ekki giftingar samkynhneigðra, vegna þess að ef tveim manneskjum þykir vænt hvorri um aðra, og vilja játa það fyrir heiminum og fyrir Guði, þá hugsa ég að það ætti að vera í góðu lagi hans vegna, óháð því hvort manneskjurnar tvær eru karl og kona, eða karl og karl, eða kona og kona. Erum við ekki öll jöfn fyrir Guði skv. kristnu trúnni? Af hverju ætti það þá að angra hann hvers kyns fólkið er?

Ég styð heilshugar giftingu samkynhneigðra. Það er mín skoðun að ef fólk elskar hvort annað á þann hátt ætti það að drífa sig í hnapphelduna, óháð kyni! Það er fáránlegt að leyfa ekki öllu venjulegu, ástríku fólki að staðfesta ást sína á þann hátt sem það sjálft kýs. Hættum þessari vitleysu og leyfum öllum að gifta sig sem það vilja.

Höfundur er framhaldsskólanemi.