Sjálfhverfa og mont

Það komst illilega upp um sjálfhverfu mína þegar við Ágúst gengum inn á senuna í Langholtskirkju í gærkvöldi, ég á undan og steingleymdi Ágústi og hneigði mig bara og naut lófataksins um leið og ég kom inn en beið ekki eftir honum

Tónleikarnir gengu mjög vel þó ég segi sjálf frá (og dreg ekkert undan), en það rifjaðist reyndar upp fyrir mér í lokakafla tríósónötunnar af hverju menn forðast það eins og heitan eldinn að spila tríósónötur á tónleikum (hugsaði "ómægod ómægod hvar endar þetta" og horfði furðulostin á puttana á mér á fleygiferð).

Fjórhenta stykkið féll vel í kramið og almennt þóttu tónleikarnir hinir skemmtilegustu, allavegana hefur enginn þorað að segja annað við mig.  Mætingin var glæsileg enda vorum við búin að fá hellings umfjöllun í blöðum, útvarpi og sjónvarpi http://dagskra.ruv.is/streaming/sjonvarpid/?file=4398104/18

Eftir tónleikana mokuðum við í okkur silungi og súrmat og sólberjavíni og rifsberjavíni og rabbarbaravíni (jájá í barn-á-brjósti-magni) hjá Jónsa og Ólu, komum seint heim og Ágúst rauk í flug eitursnemma í morgun.  Og nú er best að ég leggi mig úr því að Ágúst Ísleifur (sem svaf í vagninum sínum alla tónleikana) er sofnaður úti á svölum, yfir og út.

Athugasemdir

[Elín Björk (IP-tala skráð) 10.11.2008 kl. 15:02]

Flensan sem hefur enn ekki gefist upp hélt mér heima við, kem bara þegar þetta verður endurtekið! 

[Hallveig (IP-tala skráð) 11.11.2008 kl. 21:03]

Til lukku með tónleikana !!!  og gaman að sjá ykkur í sjónvarpinu...ooo nú eru þið sko fræg

Hvernig er það annars, langar þig ekki að halda tríósónötunni í puttunum fram yfir áramót??? langar þig ekki ofboðslega til að spila hana aftur á einktónleikum í Horsens fyrir mágkonu þína  

[Elín Una Jónsdóttir (IP-tala skráð) 14.11.2008 kl. 01:28]

Sæl frænka. Rosalega ertu komin með sítt hár!  Sá þig í sjónvarpinu og þið hjónin voruð ótrúlega krúttleg og sæt  (spiluðuð líka rosa vel en í sjónvarpi er auðvitað aðalatriðið að vera sætur eins og allir vita).  Gaman að fylgjast með blogginu þínu og sjá myndir af Ísleifi Ágústi.  Hafðu það gott á Íslandi. Kveðja frá Kanada.