Ótrúleg afköst

Ég er að hamast við að hitta alla og fann nýja aðferð, í hvert skipti sem einhver býður mér í heimsókn býð ég einhverjum öðrum með mér.  Vona að það fæli fólk ekki frá því að bjóða mér heim.  Bauð Ólöfu með mér til Halldóru, Dagbjörtu og Ólöfu til Hauks og Adrians (nánari skýringar líklega nauðsynlegar), Auði til Gunnhildar, fór reyndar bara ein (nja með Ágústi Ísleifi) til ömmu og Guðnýjar Einars...

En hvar kemur Adrian (Elínarmaður) inn í málið? Jújú útlendingar streyma til landsins að kaupa vinnuvélar og fyrirtækið hans Adrians er einmitt vinnuvéla-kaup-og-sölu-fyrirtæki svo hann er mættur í verslunarferð.

Btw komin í Hlíðarhjallann til mömmu, minni á að ég fer á sunnudaginn svona ef einhvern langar óendanlega til að hitta mig

Sjálfhverfa og mont

Það komst illilega upp um sjálfhverfu mína þegar við Ágúst gengum inn á senuna í Langholtskirkju í gærkvöldi, ég á undan og steingleymdi Ágústi og hneigði mig bara og naut lófataksins um leið og ég kom inn en beið ekki eftir honum

Tónleikarnir gengu mjög vel þó ég segi sjálf frá (og dreg ekkert undan), en það rifjaðist reyndar upp fyrir mér í lokakafla tríósónötunnar af hverju menn forðast það eins og heitan eldinn að spila tríósónötur á tónleikum (hugsaði "ómægod ómægod hvar endar þetta" og horfði furðulostin á puttana á mér á fleygiferð).

Fjórhenta stykkið féll vel í kramið og almennt þóttu tónleikarnir hinir skemmtilegustu, allavegana hefur enginn þorað að segja annað við mig.  Mætingin var glæsileg enda vorum við búin að fá hellings umfjöllun í blöðum, útvarpi og sjónvarpi http://dagskra.ruv.is/streaming/sjonvarpid/?file=4398104/18

Eftir tónleikana mokuðum við í okkur silungi og súrmat og sólberjavíni og rifsberjavíni og rabbarbaravíni (jájá í barn-á-brjósti-magni) hjá Jónsa og Ólu, komum seint heim og Ágúst rauk í flug eitursnemma í morgun.  Og nú er best að ég leggi mig úr því að Ágúst Ísleifur (sem svaf í vagninum sínum alla tónleikana) er sofnaður úti á svölum, yfir og út.

Þættinum hefur borist bréf

Frá Kór Langholtskirkju:

Samkvæmt meðfylgjandi yfirliti út bókhaldi kórsins viðrist þú skulda Kór Langholtskirkju kr. 63.403.-, sem við biðjum þig að greiða sem allra fyrst samkvæmt greiðsluseðli eða í reikning kórsins; xxx-xxx.

Ef þú telur þig ekki vera í skuld við kórinn biðjumst við velvirðingar á þessu bréfi, en biðjum þig jafnframt að hafa samband við núverandi gjaldkera til að hægt sé að gera viðeigandi leiðréttingar í bókhaldi kórsins.  Ef þú hefur einhverjar aðrar athugasemdir við innheimtuna eða telur hana ekki réttmæta þarf jafnframt að hafa samband vegna þess.  Ef þú telur réttara að gera grein fyrir sjónarmiðum þínum við fyrri gjaldkera þar sem skuldin er frá hans starfsárum má gjarnan hafa samband við hann.

Beðist er velvirðinggar á töfum á þessari síðbúnu innheimtu sem stafa af gjaldkeraskiptum, önnum núverandi og fyrrverandi gjaldkera, svo og ýmsum öðrum tilfallandi atvikum.

Bestu kveðjur,

 

Undir þetta rita núverandi og fyrrverandi gjaldkeri kórsins.  Rugluðust þau á mínus og plús? "Meðfylgjandi yfirlit" fylgdi ekki með svo ég átta mig ekki alveg á þessu...

Maður er nú fínn svona nýbaðaður

En það er spurning hvort verða fleiri baðferðir á heimilinu, kostar 50.000 danskar að fá hitaveituna.  En spáum ekki í það núna, komum bara til Íslands og förum í bað þar.  Er annars einhver sem vill lána þessum krúttlega strák barnavagn í nokkra daga?

Hjemrejsen etc.

Við tókum niður loðhúfurnar í gær eftir að VVS-maðurinn kom og fixaði kyndinguna og tengdi við olíubrúsa í þvottahúsinu.  VVS-menn halda danska þjóðfélaginu gangandi og gera allt sem þarf að gera, ég spurði gaurinn (hann Steen) hvað þetta þýddi og hann sagði "Vores Ven Steen".  Hann er greinilega vinsælasti VVS-maðurinn.  Hann viðurkenndi reyndar að það þýddi Vand, Ventilation og Sanitet, alls ekki eins skáldlegt.  En nú eru allavegana ekki lengur 13° í eldhúsinu og við erum að vinna í því að fá blessaða hitaveituna tengda.

Að allt öðru og skemmtilegra: Vi er på vej til Island að spila konsert, en það er bara afsökun, við erum að sjálfsögðu að koma til að sýna okkur og sjá aðra.  Við komum þrjú saman á fimmtudaginn (6. nóv.), tónleikarnir á sunnudagskvöld kl. 20 (skyldumæting), Ágúst fer heim á mánudeginum en við Ágúst Ísleifur förum ekki fyrr en 16. nóvember.

Og að enn öðru: Sýnishorn af hópmyndatökum:

(maður tollir nú ekki endalaust uppréttur á þessum aldri)

 

Kominn tími til að plögga tónleika

Alle tiders plaggat...

Já hlæjiði bara

Ég lenti í svo brattri brekku í dag að ég komst varla niður hana með barnavagninn.  Alveg satt, ég nefnilega bý í dönsku ölpunum.

En desúðen þá tekur Ágúst Ísleifur sig sérdeilis vel út í kisugallanum sem Bjargey prjónaði á hann.  Edda Sjöfn Heimisdóttir og Sigrúnar vinkona hans á Íslandi fékk mýslugalla í stíl svo það verður sjálfsagt fjör þegar þau hittast næst!

 

Ágúst Ísleifur étur okkur út á gaddinn

Hann þarf sosum ekkert að éta okkur ÚT á gaddinn því olían fyrir kyndinguna og heita vatnið kláraðist óvænt á fimmtudaginn og það er brunagaddur innan dyra.  En hvað sem því líður þá er þetta hálffullorðna, hraðvaxandi og sísvanga barn farið að fá grautarslettu skv. hjúkkuráði.  Og það er ekkert smáræði sem barnið slafrar í sig, fær velling úr 1/4 teskeið af hrísmjöli takk fyrir, tvisvar á dag.  Eins gott að ég keypti kíló af méli.  Þetta gerir 1/2 teskeið á dag, 3 1/2 teskeið á viku, við erum að tala um 17.5 ml af hrísmjöli á viku, púff.

En þetta með gaddinn er ekkert grín.  Því var logið að okkur að olían í tanknum undir rósabeðinu mundi endast fram á vor og þá ætluðum við að fá hitaveitu í húsið, en það hefur líklega verið miðað við ársnotkun ekkils sem fór í bað fyrir jól og páska og hitaði húsið upp með pípureykingum.  En þegar kyndingin brann út á fimmtudaginn hringdi ég í Horsens varmeværk og heimtaði fjernvarme med det samme af því við værum löbet tör for olie þá tók fjernvarmemaðurinn bara vel í það, en æjæj mánaðarbið.  Og leiðindamál og vesen að koma kyndingunni af stað aftur, en við sjáum hvað setur.  Allavegana ágætt að það gerir ekkert til að gleyma matnum á borðinu, smjörið linast ekki einu sinni.

Efnahagsaðstoð í formi eldhúspappírs

Ömmurnar fóru til útlanda að heimsækja barnabarnið.  Enginn gjaldeyrir og glatað gengi = engin innkaup = tómar töskur á leiðinni heim (voru notaðar til að ferja dót út), það endaði með því að frúrnar voru sendar heim með töskur fullar af eldhúsrúllum til að töskugreyin kremdust ekki á ferðalaginu!!!!  Við vonum að eldhúspappírinn komi sér vel á Íslandi á þessum síðustu og verstu tímum.

Þar fyrir utan var náttúrulega enginn tími fyrir innkaup því það þurfti að sinna heimili og smábörnum, já og elda og borða.  Svona er td dæmigerður morgunmatur í Lindeparken (frá vinstri Amma Guðný, Bjargey, ég og Sleibbi, Elín, Vala, Amma Sigga og Selma.  Ágúst bak við myndavélina).

Annars var þetta bara einn morgun.  Svo ég fari aðeins yfir síðustu daga þá bættust Elín&Selma&Vala&Bjargey á heimilið aðfaranótt laugardags en Bjargey (sem er vinkona allra og býr í Karlsruhe) stakk af strax á laugardeginum að heimsækja systur sína í Gautaborg.  Ömmurnar flugu síðan burt á mánudagsmorgni.

En ekki má gleyma kellingaferðinni síðasta föstudag, þá fór ég með mömmu og tengdó að heimsækja Erlu Elínu til Skals þar sem hún er í margfrægum handavinnuskóla í vetur.  Kellur eru báðar handavinnukennarar og slefuðu yfir fína skólanum og Erla Elín sýndi okkur endalaust flott það sem hún og aðrir eru að gera þarna.

Það var ansi fjörugt hérna með fullt hús og allir látnir vinna.  Hér er mamma að passa tvö kríli í einu:

Og Selma bakaði af miklum móð, fyrst súkkulaðikökuna margfrægu (í nýjum kjól frá ömmu sinni) og síðan kanilsnúða eftir uppskrift frá Hallveigu.  Elín átti reyndar erfitt með að lesa skriftina hennar Hallveigar og var næstum því búin að setja 4 tsk salt í staðinn fyrir 1/2 (eða er það 1/4??).

  

Vala var látin taka til og passa Ágúst Ísleif:

  

Amma Guðný lék við litla kút.  Ef glöggt er skoðað sést að pabbi hans Ágústar Ísleifs er búinn að hengja upp spjald með stöfunum ÁÍ á leikteppið (og í vögguna) svo barnið læri ábyggilega strax að lesa.  Það hefur reyndar haft alvarlegar afleiðingar því heilabúið varð fyrir oförvun og höfuðmálið hoppaði upp um heila kúrfu skv. mælingum hjúkkunnar sem kom á föstudaginn.  Hún skipaði okkur að taka stafina niður med det samme

Ágúst Ísleifur var bara settur í að ná í snudduna sína, hann vandaði sig.

Stórt heimili

Sex næturgestir STOP búin að baka tvær eplakökur og risa súkkulaðiköku í dag STOP lambalæri með öllu í kvöldmatinn STOP enginn tími STOP