Í tilefni dagsins - Halldór Hauksson dissar forkeppnina

http://dagskra.ruv.is/streaming/ras1/?file=4314674

Opnið Hlaupanótuna í Windows media player, farið á 32.25 og haldið ykkur fast.

Trúnaðarmál af spítalanum!!

Ágúst stendur sig ekki sem skyldi með þagnareiðinn.  Hann sendi mér sms úr vinnunni í morgun og tilkynnti að það væru veikindi á spítalanum (grínlaust) og hann þyrfti að vera lengur.  Ég hélt að svona trúnaðarupplýsingar mættu alls ekki fara lengra, en úr því að hann kjaftaði þessu í mig þá get ég alveg eins lekið þessu á netið. 

En að öðru, mér finnst ég aðeins eiga í vök að verjast með að sannfæra ykkur um að það sé allt í lagi heima hjá mér.  Skoðanakönnunin sýnir:

• Það er ekki allt í lagi heima hjá Láru: 41%
• Það er allt í lagi heima hjá Láru: 11%
• Það væri allt í lagi heima hjá Láru ef hún draslaði ekki svona mikið: 47%

 

Hvað er til ráða? Mér dettur tvennt í hug:

A: Setja upp netmyndavél heima hjá mér, það ætti að sannfæra alla. (Bara spurning um hvað þeir myndu sannfærast).  Þarf að ræða það við Ágúst.

B: Halda áfram myndaherferðinni og sýna umheiminum hvað ég ólst upp hjá góðri fjölskyldu.  Færa mig svo smátt og smátt yfir í nútímann, bíðið þið ekki spennt?

Af hverju mundi hann þá eftir mér?

Ég spilaði í jarðarför um daginn (sem er sosum ekki í frásögur færandi) með presti sem ég þekkti ekki.  Hann heilsaði mér fyrir jarðarförina og sagði að við hefðum nú verið saman í athöfn fyrir ca ári.  Ég viðurkenndi bara að ég mundi eeeekkert eftir honum (frekar en nokkrum manni yfirleitt) en hann sagðist ekki taka það nærri sér, það hlyti að þýða að hann hefði ekki klúðrað neinu, því það væri jú yfirleitt það sem menn myndu best eftir.  Ég samgladdist honum bara með þetta og dreif mig inn að spila.  Svo spilaði ég feilnótu í forspilinu og fattaði um leið: Af hverju mundi hann þá svona vel eftir mér??

 

En fyrir fróðleiksfúsa:

 

Landvættur, nafnorð, kvenkyn

landvættur – landvætti – landvætti – landvættar

landvætturin – landvættina – landvættinni – landvættarinnar

landvættir – landvættir – landvættum – landvætta

landvættirnar – landvættirnar – landvættunum – landvættanna

 

Óvættur getur bæði verið í kvenkyni og beygst eins og landvættur, eða í karlkyni og beygist þá eins og köttur (já nema hljóðvarpið).

 

Náttúruvætti er hvorugkynsorð og beygist eins og peningaþvætti.

 

"Skoðanakönnuninni"

Mér datt strax stafsetningaræfing í hug þegar ég skrifaði tölvupóst til blog.is og spurði um skoðanakönnunina mína í þágufalli, þ.e. af hverju hún birtist ekki.  Eigi er örgrannt um að skoðanir margra séu á öndverðum meiði við meirihluta skoðananna í samfélagi voru.  Óðinn átti hrafnana Hugin og Munin.  Huginn þekkti Munin, en enginn annar sá á þeim muninn.  Mun... (púff hvernig er Muninn í þágufalli?) hugnaðist ekki hvernig Huginn felldi hug til munúðarfullu mærinnar....

En nú lýsi ég eftir fallbeygingum - kann einhver að fallbeygja eftirfarandi í öllum föllum með og án greinis: (Mamma, ég mana þig, þú smellir bara á "athugasemdir")

Huginn, Muninn, landvættur (bókmenntakennarinn gat það ekki), náttúruvætti.

Koma svo!! (og endilega haldið ótrauð áfram að svara skoðannnnakönnnnnunnnninnnnni)

"Er ekki allt í lagi heima hjá þér?"

Þetta voru viðbrögð Elínar stórusystur við bloggsíðu minni.  Að sjálfsögðu er allt í lagi heima hjá mér eins og má sjá á þessari fjölskyldumynd:

En til að taka allan vafa hef ég sett inn skoðanakönnun svo þið, lesendur góðir, getið úrskurðað um mig og heimili mitt.

9 erindi

Undirtitill þessarar færslu er ORGANISTAPIRRINGUR

Ég var að spila í útvarpsmessu, alltaf gaman að því nema í þetta skiptið var ég með 39 stiga hita, orgelið pínulítið og óspennandi (í háskólakapellunni) og ógeðslega mörg erindi af öllum sálmunum og allt sérviskulegir biblíusálmar í tilefni af biblíudeginum.  Ég bjargaði reyndar 9-erinda-sálminum með tveimur júróvisjónhækkunum, geri aðrir betur.

Hafi einhver verið svo óheppinn að missa af messunni þá má heyra hana hér: http://dagskra.ruv.is/streaming/ras1/?file=4315520

Ármannsfellið fagurblátt

Það voru engar jarðarfarir á fimmtudaginn þannig að ég ákvað að skella mér í labbitúr.  Þannig er að við í gönguleiðsögninni eigum að skila inn "logbók" með 10 vænum gönguferðum í og það er ágætis hvatning til að skella sér af stað!  Ég fékk tvær úr bekknum með mér og lánaði þeim brodda og axir.  Veðrið var brilljant og við keyrðum á Þingvelli, stoppuðum þegar við vorum komnar með góða fjallasýn og völdum okkur fjall.  Ármannsfellið reyndist mun skemmtilegra en ég átti von á, það virkar bara svo lítið við hliðina á Botnssúlunum að ég hélt alltaf að það væri ekkert spennandi.  Það var hins vegar svona gaman:

Og útsýnið svona gott:

Svo kom ég heim og rauk beint á hjólinu á Gradualeæfingu, Jónsi í útlöndum og ég notaði tækifærið og píndi liðið til dauðs í Maríuljóði og fleiru skemmtilegu.  Eftir það fór ég beint á hjólaæfingu, hjólafélagið mitt var svo tillitssamt að nenna að hitta mig eftir gradualeæfingu upp úr 7, en hjólaæfingin byrjar samt kl. 18:30 (þess má reyndar geta að það var alveg einn heill hjólamaður á æfingunni fyrir utan mig...).  Við hjóluðum til rúmlega 21 og skelltum svo í okkur borgara á Vitabarnum, meiri búllan!!  Við skerum okkur soldið úr þegar við mætum þarna í nördagallanum kófsveitt og sjúskuð (hinir eru bara reykjandi, drekkandi og sjúskaðir á fimmtudagskvöldi).  Það var reyndar hjólakeppni í sjónvarpinu á barnum þannig að við vorum bara í góðum fíling...

Ráðhildur ráðagóða

Ráðleggingar úr daglega lífinu: 

Aldrei nota hárreytitæki á lappirnar og fara svo út að hjóla í lopasokkum upp að hnjám.

Aldrei skrúfa óvart blandarakönnuna í sundur í staðinn fyrir að skrúfa hana af blandaranum þegar hún er troðfull af nýblönduðum ávaxtasafa.

En svo finnst mér þetta skemmtilegt:  http://www.youtube.com/watch?v=JzqumbhfxRo&eurl=

Ræræræ...

Sunnudagskvöld og ég sötra messuvín af stút.  Grínlaust, ég var send heim með restina, cabernet sauvignon frá Chile, býsna gott.  Sit og æfi sönglags-útgáfu af Liebestraum e. Liszt fyrir jarðarför á morgun, Halldóra mín ertu til í að fletta? 

En að öðru: Gönguleiðsagnarhópurinn var á vetrarfjallamennskunámskeiði um helgina en ég skrópaði af því að ég tók svona námskeið hjá íslenskum fjallaleiðsögumönnum í fyrra og leist betur á að spila í messu (lesist: græða peninga) og hjálpa tengdamömmu að flytja (upp á Kjalarnes).  Svo er ég líka svo "ofmetnuð" eftir allt ísklifrið að ég nenni ekki að læra um broddamennsku með byrjendum (ekki verða reiðar harps og hils). 

Um vetrarfjallamennskunámskeiðið í fyrra: Ég og Ágúst ásamt 2 öðrum og kennara djöfluðumst í Botnssúlum rennandi á baki og maga og rassi afturábak og áfram að æfa ísaxarbremsur, klifruðum upp lóðréttar brekkur og sigum, tjölduðum svo á flottasta tjaldstæði ever á hálsinum millli Syðstu-Súlu og hinna súlanna í skííííítakulda, mér hefur aldrei verið eins kalt á rassinum að reyna að sofa!  Svona var afturámóti aðstaðan hjá samnemendum mínum í leiðsöguskólanum:

 Að lokum pistill um hjólaæfingu, ég prófaði hrikalega fyndið í gær, pedalar þar sem sveifarnar eru ekki samtengdar, þ.e. þú getur hjólað með annarri löppinni án þess að hin hreyfist sjálfkrafa með.  Furðulegt eða..? Sjálfsagt að útskýra betur ef óskir berast.

Nýr málsháttur:

Betra er að kasta mæðinni en að geispa golunni. 

Þessi varð til í ferð sem einn bekkjarfélagi minn (í gönguleiðsögn) var í.